Home خانه

د پسرلى ناوې

د پسرلى ناوې

محمد جان فنا

fana sapi 36 400نوى کال نوى هوا نوى بهار دى
نوى ژوند نوى جنبش نوى روزګار دى

چه هيواد مو هم ودان او هم سمسور شى
وخت د  کښت او بزګرۍ او نوى کار دى

نوې سا په طبيعت کښې راپيدا شوه
ژوندى شوى په قدرت دګر د کار دى

د شنو پانو په دفتر کښې ليکل شوی
کايناتو کښې د خدای قدرت اشکار دی

چه  نسيم په چليدو شو هرې خواته
له هوسه په نڅا ورته څنار دی

 د سپين زر په شان ويالې او بوته ډکې
په نارو په چيغېدو روان ابشار دی

د څپو او د موچو په خوږه ژبه
په توصيف د پسرلی  کښې سيند اقرار دی

ياسمن لمن لمن چمن خوشبوی کړو
معطره د  ګلشن درو و ديوار دی

د کاکل په شان چه وغوړيد سنبل بيا
بی ًقيمته مشک د چين او د تاتار دی

نازبو بيا په فخر و چمن ته راغله
بيا مشغوله نسترن په خپل سينګار دی

سروه بيا د پسرلی بيرغ راجګ کړو
د ګلانو هره خوا کښې تود بازار دی

اسمان شين دی لاجورد غوندې روښانه
لمن ډګه په لاله د کوهسار دی

شر و شور نه قيامت جوړ که مرغانو
له مرغانون ځينې ډک چه مرغزار دی

د پاختکو او کوترو کاروان راغی
د کارغانو خېل ملکو ځينې فرار دی

قمری جوړه کړه په سروه کښې بيا جاله
په دښتونو کښې بيا زرک په ناز رفتار دی

هنګامې د محبت تازه تازه شوې
بلبل بيا په شور فرياد او په چيغار دی