Home خانه

امریکا قطر کې د سولې مذاکرات پیل کړل

امریکا قطر کې د سولې مذاکرات پیل کړل

11111111111 د طالبانو او امریکایانو ترمنځ نن د قطر په دوحه کې د افغان سولې په تړاو خبرې پيل شوې.
یوې باوري سرچېنې شمشاد ته وویل، په دغو خبرو کې به ټینګار د تاوتریخوالي په کمولو وي څو بین الافغاني مذاکراتو او اوربند ته زمینه مساعده شي.
د افغان سولې لپاره د امریکا بهرنیو چارو وزارت ځانګړي استازي زلمي خلیل زاد په کابل کې له ولسمشر اشرف غني او یو شمیر نورو افغان سیاستوالو سره له لیدو وروسته قطر دوحې ته سفر کړی.
له دې سره شمشاد ټلوېزیون ته په قطر کې باوري سرچینو منلې چې د یوې اوونۍ په لړ کې به دوی له امریکایانو سره مخکنۍ مسوده لاسلیک کړي.
د سولې هوکړې پر مسودې له لاسلیک سره به د بهرنیو ځواکونو د وتلو د کره نیټې د مالومېدو تر څنګ د تاوتریخوالي ګراف راکم او بین الافغاني خبرو ته به هم زمینه برابره شي.

 د نړیوال بانک خبرداری

بلخوا نړیوال بانک ویلي، له طالبانو سره هر ډول سیاسي هوکړه به افغانستان کې اقتصادي فرصتونه رامنځته کړي.

نړیوال بانک پخپل تازه راپور کې ویلي، له طالبانو سره د سولې هوکړه به په نږدې راتلونکې کې پر نړیوالو مرستو د افغانستان تکیه کمه نه کړي.

دغه راز نړیوال بانک په خپل راپور کې اندېښنه ښودلې چې، افغانستان کې نفوس په ډېرېدو دی او سړي سر عاید په کمېدو.

راپور کې راغلي، له هوکړې وروسته به د امنیتي سکټور لګښتونه هم زیات شي، ځکه د دولت مخالف وسله وال به د افغان ځواکونو لیکو کې جذبېږي.

راپور کې له هوکړې وروسته د نورو وسله والو ډلو په موجودیت کې د تاوتریخوالي د دوام په اړه هم خبرداری ورکړل شوی دی.